今年生日週嘅節目有啲啲唔同，SOCIAL OUTCAST嘅羊咩竟然應約同樓上鄰居 Auntie Agnes 去食煲仔飯。

有時候，真係意料之外。從來，羊咩嘅朋友都只有同學。同事們都只係一般嘅交情，極其量都係食午飯，只有CW，EK，LM可以稱為朋友。哈，今次竟然同鄰居大澳一日遊之餘，再食埋晚餐。羊咩嘅耐性仲可以接受噃，奇怪！

當日去完郊遊，仲以為 Auntie Agnes會累，會早早回家休息（佢成七十幾歲囉）。點知，佢仲有精力，要帶羊咩到馬會食煲仔飯！一入門口，每見一個工作人員，都向Auntie Agnes 問好…升降機一出，踏入到餐廳，幾個女侍應一窩蜂咁行過嚟：曾小姐，食晚飯？羊諗，名星都係咁之嘛。

可惜，去到又無煲仔飯噃，要一月份先再有。本來要轉身入西餐廳，羊咩就見FOOD COURT有檔燒牛扒，Auntie Agnes幾醒目，話食FOOD COURT 好唔好。最後，我地分享一份燒牛扒、一份原條龍俐柳同印度薄餅，好味！

跟住成晚，羊咩就好似聽故仔咁，聆聽佢嘅往事，分享佢嘅經歷…佢仲不避嫌咁問羊咩，係咪好奇怪點解啲人個個都對佢咁尊重。其實都唔奇怪嘅，工作人員唔係要背馬會會員名單㗎咩？原來唔係，係因為Auntie Agnes 識一位猛人，而影左幅合照放喺馬會。邊個？哈哈，原來係放左係羊咩個腦成個下午嘅一個人名：TONY BLAIR

當日下午，Auntie Agnes同Auntie Rose喺度傾，有提到去英國兩星期探朋友嘅CHATEAU，又有TONY BLAIR咁咁咁。 羊咩聽落就有啲熟，又覺得TONY個名好普通，無深究。點知，原來佢講個TONY BLAIR，就係TONY BLAIR囉。 (英國前首相呀!)

之後，佢仲講好多佢帶香港泳隊出國際賽，奧運會嘅事。李啟淦，方力申，韋漢娜佢都帶過。香港運動界主要人物，佢都認識，犀利！佢話過，如果羊咩唔係咁矮，介紹羊比陳念慈識，等佢訓練羊咩做運動員。哈，佢唔知羊咩係超超齡囉。