堂堂聖保祿學生，真係唔知啲同學可以咁茅咕喎！JK拍羊咩打羽毛球，竟然可以咁樣輸比西瓜醫生同士多啤梨豬？！天呀！

話說，4隻豬有日心血來潮，想做吓運動，唔想次次都係食、食、食咁，於是訂左屋企會所羽毛球場活動吓咁啦。大家都好興致勃勃㗎，簽到啦，換衫啦，擾攘一完輪就入場，咦，見到工作人員拉住個網行出來，諗住跟住佢行就係啦…行行吓唔對路，入左去個壁球場嘅？忽然，醒起西瓜醫生話，個場會比平常康文署細…說時遲，那時快，工作人員經已搬好網入場，原來唔只係細，仲係壁球場改裝嘅添！啊…

無論如何，一場嚟度，當然照打波喇，最多咪”就”住打。本來都以為幾隻豬切磋吓，點知話要計分。都無所謂啦，哈，咁就出事嘞! 呢球又撞牆身、一分無左，個球又撞牆腳、一分又無左…，最犀利係場地又無前線，西瓜醫生嘅”影都無”嘅開球，真係前又估唔到，後又估佢唔到。好嘞，到對家，撞牆噃，一分啦，又唔係喎，玻璃門腳唔係牆；第二球嘞，撞天花，一分啦，又唔計喎，再開過…面對唔怕煩只要唔輸一分嘅師奶同學，橙同蘋果豬都只好用有限嘅聲音爭取吓，無奈嘅；只好認輸…絕對嘅挫敗感不期然慢慢升起…唉…真係天外有天，人外有人，茅有更茅！