多謝羊細佬嘅提議，羊咩叫做了解左紅樓夢個故事。上星期五，上海越劇團來港表演兩場”紅樓夢”。羊咩本來打算一家人去睇，點知父親大人嫌悶，婆婆怕夜，咁就淨番母親大人，羊細佬同羊咩。其實初初羊咩都怕自己聽唔明，不過羊細佬話剛剛裝修完，應該好似文化中心咁，有字幕。

當晚，大家都好準時，可以7：15 進場。一坐低就睇到兩邊都有燈箱，應該都係字幕喇，個心都定啲。一共有十二場景，本來以為會悶悶地，連母親大人都有咁諗㗎，所以羊咩都靜靜雞帶左小食：薑啦，合桃啦，芝士波…以備不時之需。不過，尐小食完全用唔上，一場接一場，母親大人都不知睇得幾開心。當然羊咩都有投入嘅…除左林黛玉嘅獨唱，有啲悶；同埋尐聲浪有時好似大左啲…。一套戲內，林黛玉同賈寶玉都各自有兩個演員飾演，分開上半部，下半部，不過四個都好好。羊細佬都滿意㗎，總括，大家都好享受三小時嘅表演。

唉，羊每一次睇本書，都係由第一章開始，無法喇，次次都睇唔完第一章就放棄…。而今次，羊咩，終於都大致上知道紅樓夢嘅來龍去脈，嘻嘻！