唔知咩野事？呢個週末，連環遇見新、舊相識！星期六早上遲出門，見到架電車，二話不說衝上架車啦，雖然隱約有人喺後面叫，不過羊咩都聽唔到叫咩野，照上車，最後要車長指指身後問 “係咪有人叫你呀?” 先望轉頭，原來係十年無見嘅 JACKIE! 佢剛剛喺英國返來，未知幾時走。約左遲啲食晚飯…個頭個心仲卜卜跳，魂魄都未齊，到灣仔落車時又有人叫住ELLEN，ELLEN；好在，今次認得把聲，係AUNTIE AGNES！又係約食飯，不過星期六做三伏天，又係咩都唔食得，無謂掃興，唯有婉拒左佢。

打完波，食完午餐，去做埋三伏天。羊見好天，就慢慢行去街市，買左啲零食，跟住又上電車返屋企。哈，上左樓上，直行搵位，都未坐低，又有人叫ELLEN，ELLEN；望番後面，原來係BETH，嚇得羊吖！原來佢爸爸入左養和，都三星期，依家仲休養緊。BETH朝朝早都有入嚟，不過羊返左工，無碰見過。唉，老人家係多啲問題，年紀大，機器壞。希望UNCLE，快啲可以出院啦！BETH就氣色唔錯，好好保重，朋友！

好嘞，星期日，早上打完波，返到去經過祥勝，諗住買個蛋撻補充吓，喺櫥窗望緊啲蛋糕之際，忽然有人喺裡面拍窗。咦，我都未拍窗，入面拍咩野呀？！突然個窗開左，又有人叫ELLEN，ELLEN…嘩，唔係掛？又撞到熟人？望清楚尐，嗯，好熟口面；哦，係咪KAREN？住九龍塘獨立屋嘅KAREN THE RICHIE？好在仲叫得出名，無咁失禮，雖然姓咩唔記得。又係成十幾年無見！原來佢搬左屋，依家住喺大坑。逢星期日早上，就坐車嚟嘆蛋撻同奶茶！平日就學吓茶道，去吓旅行，行吓街…真優悠！

一個二個出現，想點呀？係咪要羊咩見返啲舊人？唔好收埋自己？