嘩嘩嘩，原來星期日邊度都難搵食！

話說呢個星期，營養班有位北京嚟嘅老師教授，要連上二十四小時密集班。本來，好順利咁過咗星期五晚、星期六晏晝同晚上；羊咩以為星期日都好易過，點知…早上課完，一點鐘放午飯，羊咪施施然行出去…以為好似星期六咁，好快有位，好快落單，好舒服咁慢慢享受個豐富午餐。哼，由美國銀行中心，一直行經金鐘廊，到遠東金融中心，再到海富中心，間間食堂都係人龍…用咗20分鐘搵地方食飯，最後無計，只好硬著頭皮入一間快餐店，排隊囉，仲要無位添呀！！！好在，好在，正徬徨之際，見到有個公園，唯有好似維園阿伯咁，坐喺街食意粉！隔離左右都係菲籍人士，嘈到飛起，只好速戰速決咁食完就走！還好，天氣好，羊咩就繞住啲建築物行咗幾圈，晒吓太陽，儲存好能量，再上埋晏晝嘅三小時嘛! 嗯，咁就過咗星期日嘞！