終於…又再度鼓起勇氣，會一會波友介紹嘅中醫。本來羊咩上次睇完所謂嘅神醫，已經無信心再睇醫生。不過，最近腰酸痛得厲害，任羊咩點做拉筋，都減輕唔到痛楚，實在迫不得以已，再鼓起勇氣…唉，每次醫唔好嘅經歷，真係唔好受㗎嘛，感覺無助，煩惱，沮喪…

星期日早上，有啲唔想面對…由九點鐘拖拉到拖無可拖，終於出門口。十一點正，到達診所。見到笑容可躬嘅護士，羊咩心情依然無奈…諗緊，唔知仲有幾年可以打羽毛球呢？第日要唔要用枴杖？

等咗一陣，到羊咩喇。入到去，見到個年輕人，原來就係醫師。無啦，一場嚟度，只好照實講晒個病情，睇吓點…羊講吓一陣，佢又講一陣，佢嘅理論似乎同其他係有啲唔同。最後，拔完罐，做二十分鐘針灸，再嚟幾下極痛嘅按推，整個治療差不多一小時…嘩，承惠HK280，好抵喎！之前羊咩睇啲醫生，動不動就一隻大牛㗎！當然，抵、唔一定真係抵嘅，醫唔好，幾平幾貴都係徙啦。

不過今次最唔同嘅地方係，做完治療，羊咩一啲都唔覺累。唔係講笑㗎，全身有十幾針喎，又酸又痛廿分鐘，都幾難頂㗎。回想番，呢位醫師有幾針嘅位置係羊咩以前無針過。羊咩係痛右邊，所以大部分都針灸右邊身，但今次，有幾針係喺左邊落，仲係幾痛添。醫師仲叮囑，一定要再熱敷被推按地方，讓肌肉可以進一步放鬆。

當然，一次係唔足夠嘅，已經約咗星期六下午再嚟過。到時，醫師會再討論坐骨神經痛應做嘅運動治療。今次，羊咩真係好想、好想遇上”對”嘅醫生！