好少聽媽咪講得咁實牙實齒。話要搬出來，就真係諗得好實在。希望成事啦，今次羊細佬要幫吓手至掂。老豆個邊，就睇吓佢有無意識去改啦，唔係睇怕真係要分開住。其實，依家有事，阿媽必然係同個女住啦，真係唔係好明點解唔可以一齊住呢？媽咪同奶奶住無問題，女婿就唔同得外母住嘅，呢啲係咩野道理呀？更何況，依家係特殊情況喎，如果唔係情非得已，我估阿媽都未必想同女婿住喎！

其實，阿媽確係幾易相處㗎，起碼輕易過父親大人。佢真係自己的事自己做㗎，阿羊話幫佢都唔係次次幫到，好多時候佢都要自己做番，仲要係做得一啲都唔馬虎喎，九十四歲喎，唔簡單㗎！咁，係咪幾好嘅同屋住呢？

好在羊唔會好似阿媽咁長命，唔係一下又唔知有咩野事，都係煩到羊細佬，咁就唔好意思啦。諗諗吓，羊嘅性格都幾似係繼承阿媽，最好就自己顧自己，無咩野都唔要煩到任何人。