本來以為某舊同事係以事論事嘅人，原來唔係，無論任何人都係會講風涼話。話說最近有幾部DELL機有啲事，某舊同事就幸災樂禍咁話，好在佢揀咗蘋果機，咩嘢事都無！做人真係要公平啲，之前某舊同事都係用DELL機啦，仲兩部添，用到過保養期都無事無幹，點解依家會咁講呢？公司90％以上嘅同事，用咗幾代DELL機，除咗嫌啲機笨重，都無發生過事，只係最近更新咗啲軟件先有事。更何況，個個事例都唔同，點可以咁講說話㗎？！

當然，年中都有兩，三部要更換硬件，不過，下一個工作天就搞掂喎，蘋果，可以咩？

羊呢，真係覺得同某些人做唔到朋友，真係無損失㗎。咁多年來，羊好多時候都依靠感覺同人做朋友，不過，為免有偏見，都有跟住”路遙知馬力，日久見人心”嘅宗旨，比機會自己去了解新、舊認識嘅人深啲、全面啲。慶幸，自己嘅本能感覺真係幾準確㗎。

所以囉，到今時今日，羊身邊傾得吓偈嘅，都係同羊有一樣嘅價值觀，雖然唔可以話我哋係正常人，不過，總之都唔係壞人，都係心地好嘅。