Tag Archives: 玩具

同事剛買咗部中文電子書閱讀器，以為可以好好地讀中文書，點知發現，買入嘅中文小說竟然係橫排!! 正嗚呼哀哉，又煩惱點搵啲直排嘅中文書時…羊當然急不及待提供意見，並展示自己嘅玩具… 嘻嘻..睇落去就似乎三部都差不多…不過，用途就大不同啦。羊一路都有努力將實體書減少，要盡量斷捨離，所以KINDLE主要係放啲仲會、想睇嘅英文書。至於兩部MooInk，就…係凡事都要有備用嘅。咁多中文書，萬一其中一部壞咗，仲有部後備吖嘛。最重要係…MooInk係世上暫時僅有嘅「橫排」轉「直排」嘅中文書閱讀器囉。🤭 …至於我部金庸機，儘管喺功能上到今時今日依然係一流，然而反應慢咗啲，電耗快咗啲，所以都係適合用嚟收藏嘅，畢竟係一個十二年前發明嘅古董了。

終於都頂唔住嘞！公司用開個SKYPE耳機，的確好好用，不過啲料就麻麻地，近呢年每用完一次，耳筒軟墊都會甩啲物料。甩到好似漫天雪花咁，不過人地係白色，羊呢，係成檯黑色囉，連耳仔都有黑色碎屑！最後，自己都去買咗個藍牙耳機…。係就係肉赤，不過，始終係CERTIFIED，話音同收音都真係同普通聽音樂嘅藍牙無得比嘅。

本來呢，傷心事就唔想提啦。 其實就係換咗個新手提電話之後，一直連接唔到隻智能手錶。問過SONY 同 FOSSIL熱線，話可能制式唔啱，太新同太舊無辦法處理。本來都判咗失效㗎嘞，不過，羊抱住不甘心嘅態度，本住破斧尋舟精神，將所有都移除晒，從頭做一次，橫豎都連接唔到…。 再一次嘗試連接，終於，不負有心羊，又連接到啦！羊又可以用番隻手錶啦！ 哈哈，傷心事變開心事！