原本打算同父親，母親大人，細佬，睇音樂舞台劇蝦仔爹哋II，後來因佢地嘅旅行計劃又無左件事。哈，又估唔到JK同AMI都話買飛去睇，羊咩緊係一口應承。終於，星期六晚喺RUBY’s TUESDAY 食完飽飽，就去左九龍展覽中心，睇左佢地嘅第二場表演。

同以前一樣，都係吵吵鬧鬧最後大團圓。不過經典角色形象深刻，阿珍，蝦仔，大白鯊，懞豬眼各個性均深入民心，其實有無劇情都無所謂喇，嘻嘻哈哈一大餐就算。我地睇個晚，有林峯、吳啟華、廖安麗、黃日華、金剛、江欣燕、林曉峰、梁唯烈、余慕蓮！ 其他場又有陳慧琳、吳君如、梁家輝、曾志偉、陳百祥、苗僑偉、同朱咪咪。

套劇加入依家嘅一尐特區政府話題，仲有韓風騎馬舞，當然唔少得佢地嘅扮野表演啦（羅記，梅艷芳，陳煥仁…）仲唱埋歡樂今宵添！