羊，終於都轉了髮型師。心，十五、十六…不過，要做嘅，點都要做。年前要做嘅，已經拖到依家，唉，…羊唔想無咗個朋友。二月尾，馬經理介紹咗個同佢剪咗又係十幾年嘅師傅，本來諗住差極有限，不過，試過之後先知原來馬婷嘅要求出奇地唔高。頂住個尷尷尬尬頭，再隔多三星期，又試小馬嘅介紹，今次終於似模似樣嘞。其實，羊，廿幾年啦，習慣晒JK嘅剪法。一下子轉變，又係有啲戰戰驚驚嘅！不過，真係又唔錯喎。一個小時做完，連剪，連洗，連吹！正！仲要唔貴。不過，見 Stylist 都小心，仔細嘅，剪得羊整整齊齊，但都要睇吓三星期後個頭變成點。仲有呀，佢好似都係有啲嫌棄羊唔肯搽野喺個頭…。