本來同老友嘅事，一直以為係小小誤會，應該好快無野。原來人算不如天算，唔算鬧大咗，不過唔知點收科啫。羊唔會認為我哋係絕交嘅，可能係暫時竭一竭…

好在，好在，王醫生都同羊發覺同一件事，就係羊同老友，咁多年來，都無問題，事情發生只係喺士多啤梨進入咗老友嘅生活。唔係搵人賴，不過，王醫生一語道破羊一直唔想承認嘅問題，羊先一發不可收拾咁講出來。

嗱，其一:
成日就投訴JK 無時間陪，話點解啲客嘅時間唔可以改。人地問得幾點剪就係想幾點啦，問咩野呢？服務性行業係咁㗎啦。跟手又話唔係講緊你（羊），但係，羊的確係JK其中嘅一個微不足道嘅客囉，咁講，你哋又有無顧吓我嘅感受呢？羊唔係一個唔體諒人嘅動物，既然咁講，羊好意思約啲阻住你哋約會嘅時間咩？不如轉個髮型師好過，大家免煩！

其二：羊同JK飲野，其實都好隨便，有時飲多咗係避免唔到，但係如果次次都咁大壓力，羊，寧願唔出來囉。

其三，就係JK變咗，已經唔係以前有趣，又隨心嘅JK。呢樣唔係只係羊講，王醫生同敵人都係咁覺得。

其實，KAM 都好擔心我哋，不過，KAM 又唔知咁多，無謂講多件事，影響佢同士多啤梨嘅感情。就算KAM明白，唔通同老友講出真正嘅原因咩？輸個朋友點都好過令佢地心有條刺。羊，唔做啲咁嘅事。羊又唔係陪佢老嘅，最起碼佢地兩個開心，可以一直到老。

無論係點，最後只有兩個方案。一係佢地兩個白頭到老，咁都算有件事圓滿。一係就，等老友有番自由，我哋就無事，光復囉！我哋仲係朋友，無懷疑㗎！