Tag Archives: 吃

嘻嘻，二十八號晚同同學食生日飯，終於都食到舊年嘅願望：食鰣魚嘞，兼完成所有上海餐嚕。當晚有KAM，AMI，JK，SYLVAN同瑜伽。雖然條魚就煮過熟，不過難得有人陪羊咩食噃，幾熟都好味！自從父親皮膚敏感發作，要戒食海鮮，已經好耐好耐無食蒸原條魚喇。屋企餐生日飯，都係豆腐呀，青菜，木耳…。總之，一家人齊齊整整就足夠。無論如何，多謝咁多位嘅心意。 今餐重點唔係尐餸，係人同氣氛，所以無食物介紹，只有心神領會… 總之，希望屋企人，朋友們，大家都身體健康，生活快樂。

前一些日子，本來同事們已策劃到大澳一天遊，可惜推遲、推遲又推遲，一直都再無消息。最後，羊咩放假時候跟樓上鄰居Auntie AGNES同佢幾十年老友Auntie ROSE一齊去左嚕！ 我地 12:00 由跑馬地出發，搭港鐵在東涌站落車， 然後係東涌站旁邊的巴士總站，搭新大嶼山巴士11號前往大澳（全程大約30至40分鐘），之後再乘小船直接去大澳文物酒店( 舊大澳警署)食午餐（下雨天收HKD10一位）。風平浪靜，正！ 雖然當日係落住毛毛雨，不過我地食完午餐後，正想慢慢行返去巴士總站，雨停左！景點:洪聖古廟，關帝古廟，楊侯古廟，大澳市場，大澳天后古廟（北市天后古廟），大澳新村天后古廟（鹽田天后古廟）。 羊咩當然無買手信啦，有好多選擇㗎: 蝦膏、蝦醬、鹹魚、海味、魷魚絲、紫菜、爆膠、蝦乾、蛋黃、髮菜、化痰止咳的甘桔、貝殼手鍊頸鍊、珍珠鍊、雞泡魚、貝殼風鈴、貝殼哨子等。 因為陰陰天，唔多小食店開，不過都有: 雞屎藤、糯米滋、南瓜茶果、魷魚乾等，可惜未能見到出名的炭爐雞蛋仔…。

一連幾餐嘅上海菜，一隻肥羊終於都變成肥肥羊喇。 星期六晚又同莎莉去左間上海店：滬江。老牌上海菜館，但地方就新裝修，尐檯唔算迫，不過一樣咁嘈。莎莉一向都眼闊肚窄，都阻止唔住，所以兩個人都叫左六樣餸：香乾馬蘭頭，蟹粉小籠包，清炒豆苗，鎮江肴肉併燻魚，外婆紅燒肉，清炒河蝦仁。真係一山還有一山高，佢尐香乾馬蘭頭比老上海更香更好味！燻魚唔夠香，甜左尐，魚肉切得少件多碎骨。豆苗的鮮嫩清新，炒得鑊氣十足，好味。今次真係食唔晒，好在莎莉打包返屋企。 好嘞，剩下星期三浙江軒一餐上海菜。之後應該係西餐嘞。 人地就感謝週，羊咩可以話係上海週！不過，羊咩又無厭噃。今年生日，充滿上海味！