終於完成了初級（動功），中級 (靜功:小周天），同高級 (靜功: 大周天同奇經) 氣功班嘞！本來可以早兩星期，可恨羊咩身體唔爭氣，咳足三個星期，係上週先好啲。唉唉唉，又話學氣功會醫好氣虛，氣管敏感既？！嗯，一定要努力啲追番。咳左三個星期就停左三個星期練功，無法噃，一吸氣就咳，有氣都咳到散。上星期六就學最後一堂：動功呼吸法，咁就暫時完成氣功班。進階班比較昂貴，要停一停，想一想，同儲一儲銀兩先再打算嚕。

休息一個月，四月十四日開始太極班，係吳式太極一百零八式。老師話，勤力學就半年至九個月；如果唔係就大約一年先畢業。大佬好似係學陳式，唔知有邊啲唔同呢？下星期五同佢食飯可以問吓先。希望，羊咩唔會學得前幾式又唔記得後幾式啦，一百零八式，唔簡單咕喎，唔係就真係『學無止景』…，嘻嘻。