前兩日同同學見面。傾傾吓，話羊咩古怪喎。係咩？羊自己唔覺，只係覺得自己有尐 SOCIAL OUTCAST 咁啫。其實咩野叫做古怪或者唔正常？係咪同大部份人唔相同就係唔正常？

唔講說話
羊咩只係傾向於唔講說話，除非有人直接問羊問題。”Not talking is the best way to not say something stupid”。當然，同自己嘅老朋友相處，又唔同講法。羊咩都有唔少話題㗎，只係唔係尐容易有共鳴。所以，羊咩寧願靜靜咁做聆聽羊囉，有唔妥咩？

怕小朋友
係㗎，羊咩都唔知點同小魔怪相處，又怕佢地喊，又怕佢地百厭整親，又怕佢地嘈，最怕係唔知同佢地講咩好! 唉，總之，唔知點囉。羊咩咁大個淨係同羊細佬一個小朋友玩，佢仲要係千年難得一見又守規矩，又聽話嘅小朋友。咁，羊咩又點會識同尐魔怪溝通？

道不同不相為謀
唔知算唔算麻煩，不過羊咩的確唔同尐自己唔鍾意嘅人相處，那怕只係食餐飯或者傾兩句，都唔想囉。不過，唔係個個都鍾意同自己喜歡嘅人相處嘅咩？做朋友，要價值觀相似至傾得埋。唔係，點講野呀？最起碼，要有認同，有共同興趣，互相尊重欣賞，係咪？

羊咩最多認自我左尐，不過，羊都唔介意比人話古怪嘅，都慣啦。嘻嘻！當然，同JK咁受大、小朋友歡迎嘅，係完全南轅北轍啦！不過，我地好朋友得無人信噃，古怪乎？