同學放一星期假，羊咩又趁機放一日假，一齊休息吓！ 本來原定計劃想去郊遊一下，殊不知前一天八號風球，唯有改變計劃，轉PLAN B: 室內活動。咁昨天就一早去食個大早餐，準備好能量，之後就過海到奧海城打羽毛球。雖然球場就熱咗啲，但勝在又光，樓底又高，幾乎好過公共羽毛球場！ 士多啤梨豬因傷唔可以落場，所以今次粉紅佳人隊，只有西瓜豬單身上陣。哈哈，唔知係咪讓賽呢?! 今次粉紅隊少咗鬼影變幻球，羊咩勉強叫做應付得到，賽果當然係：”打和啦！”

梳洗完畢，一行三人跟住就去咗傳說中嘅圓方 High Tea！嘻嘻，羊咩係第一次去嘛！
個 SET 唔錯，不過就甜點多咗啲。仲食咗幾件都唔知裡面係咩東東… 唔知係咪個環境真係咁舒服，不知不覺就坐咗四小時！嘩，羊咩飲茶都未試過咁耐！剛剛駛出停車場，天又黑齊，咦，又係時候返中環同剛考完日文嘅JK晚飯嚕！晚上十一點幾，終於抱住個大肚腩，好充實，好飽滿咁返到屋企…