羊咩星期日下午又去咗油麻地睇大夫。同學介紹，話醫佢個膝頭蓋，醫得好好，既然讚成咁，羊又何妨一試。

約咗4：30，不過羊咩早到咗半小時，天時暑熱，又唔想週街行，只好早啲上診所坐住等。一出電梯，唔係化，已經聽到啲魔怪嘅叫喊 ，心諗，仲去唔去好呢？不過，無理由放棄可以醫好羊咩嘅機會嘛，只好頂硬上，按鈴。好在，入咗去之後靜番啲，仲頂得住。

環境舒適，七，八個大，小朋友坐喺度，都唔算好迫。等咗45分鐘，終於到羊咩喇，入房坐低，就開始應診。醫師問咩野，羊咪答咩野囉，哈，講講吓，叫停羊咩喎！哼，羊從來只有比人話講得少，叫停羊？！算！當你係神醫好無？睇吓你又有咩野意見。。。

之後，針灸20分鐘，拔罐20分鐘，拉背15分鐘，連解釋，連等。。。羊咩出到嚟，已經天都黑齊，6：30都唔止。唉，好唔好真係講唔出，不過累到唔想講野，唔想郁就真嘅。。。返到屋企，已經係7：45，想死！

之後，見到同學們嘅問候，羊咩都無力答，只想洗白白就上床瞓個你死我活！天呀！睇個醫生，點會累成咁㗎？！