最近公司大地震，當權者紛紛落台。當然，有人走，就有人嚟啦。不過，羊咩真係唔會介紹朋友囉。唔係話間公司唔好，不過，外面世界咁大，又唔係無其他選擇，點解要返轉頭呢？人地重金禮聘請返，就話好；食回頭草，諗吓好啦。當然，有情意結就另計。

嗯，羊咩唔會反對嘅，大家都係做事啫。不過，要由朋友轉做同事，要少少時間適應。係㗎，喺羊咩心目中，同事同朋友差幾級㗎。幫朋友，講交情，可以無底線; 但係幫同事，要客氣，講面子，必須有規則。

嘻，古怪？係㗎，羊咩一向想法奇怪㗎啦。