Tag Archives: 佘詩曼

之前有時候會睇吓娛樂新聞，都發覺依家多咗好多批評，唔係完全惡意，不過善意嘅好少囉。啲言詞有時候都好過火，甚至惡毒。其實，如果真係咁唔喜歡某位演員，咪唔好睇囉，可以揀㗎嘛，唔需要人身攻擊、詛咒㗎。好似羊咁，超討厭某個歌手，雖然佢公認係唱得好好好，不過，唔鍾意就係唔鍾意，見親聽親有佢咪轉台或者熄機囉。但係，羊唔會聽完睇完然後寫篇文罵佢，傻嘅咩，浪費自己時間嘛，鬧完好爽咩？損人不利己好爽咩？我覺得罷聽罷睇仲爽喎，真係多一個唔多，少一個唔少，大家都無損失！批評唔係唔好，但係要有道理，有建設性先得㗎嘛。不過既然唔鍾意，懶得批評啦，係咪？！ 鍾意同討厭某個人，其實好主觀，有時無得解釋嘅。有機會咪了解吓，無咪將唔喜歡嘅係剔除佢囉。點解要令生活咁不滿意呢？無得選擇就話啫，可以揀，點解唔令自己開心啲呢？ 羊點解咁突然，咁無聊講呢啲？因為，最近睇得好多惡意批評。唔係要代人抱不平，不過，想支持吓羊喜歡嘅人。被人惡意中傷，批評，嘲諷等都可以處理得好，真係要有個強大嘅心！係呀，羊嘅女神們！希望佢哋，繼續，遇強越強，遇到詆譭以行動證明自己，越是被打壓越要變強！

部戲，好難得可以見番大部分嘅原本演員，感動。 演員，好戲，恰到好處。 場景，好靚；音樂，超配合！ 劇情，一塌糊塗！ 知道要電影拍到電視劇係無可能，一來時間，二來係唔同嘅媒體，有唔同嘅重點。唉，不過個導演睇高咗自己囉。 其實，要感動人，只要捉重點，一絲絲線觸動人心就得啦。唔需要有咁慘，得咁慘嘅。死人、車禍、山崩、自殺、失憶、腦瘤…嚇唔死人，都笑死人。炒雜菜，咩野都炒埋一碟… 羊，當然唔識點拍戲，不過都明白，電影用鏡頭故事，唔係不停咁用人，劇情，對白去交代…都唔係電視連續劇，又唔夠時間。最後，咪得個亂，故事零碎，講講吓呢度，又可以講咗第二條線，剛剛培養好個情緒，轉個鏡頭就講第二樣野，都唔知想講啲咩野。 身為粉絲，見到初哥哥，君好，琪琪，超多大頭SHOTS，其實最基本要求已經達到。不過，見到部戲變成咁，有好演員又…唉，有啲不吐不快啫。