唉,唉,唉!一直以來,羊都同自己講,睇唔完紅樓夢,係無時間好好坐響度睇啫,遲啲一定可以完成嘅。終於,上星期鼓起勇氣借咗本簡單嘅吳淡如版番屋企。的確,每一回都好簡單明快,羊總算可以一回接一回咁睇落去!唔似得中華書局版,每次睇唔到三份一,就被周先生急召咗去。不過今次,羊每晚都要鼓勵自己,要好好咁專心,投入。成本書來來去去都係啲人事,吵吵鬧鬧咁,人又多喎,都唔記得邊個同邊個合不來,邊個同邊個不咬弦,超煩,羊完全無耐性去了解。最後,用咗兩個星期睇完。可惜嘅係,羊一啲都唔享受閱讀嘅過程,似細個要完成個閱讀報告,馬馬虎虎咁睇多啲囉。
媽咪,真係服咗您啦!咁艱難睇嘅書都可以睇完!佩服!睇怕羊都係無呢個能耐,可以欣賞呢套曠世巨著嘅原裝版本。