對於羊咩呢個單身一族，多假期真係唔係一件樂事。都唔知點放好，羊又無旅行癮，啲朋友又唔多，放假都係留喺洞穴休息。

不過，羊都歡迎呢個政策嘅，起碼，鍾意放假嘅人又可以去多啲旅行；有家庭嘅，又多啲時間陪屋企人；單身嘅，咪休息吓囉，其實都無壞。可惜，依然有人唯恐天下不亂，又喺度嫌三嫌四，又話要完成銷售目標，叫人點放得晒呀，唔公平喎；又話辦公室工種使唔使咁多假，又唔係做紀律部隊咁喎。又話屋企人都無咁多假，自己放嚟做咩嘢喎，多餘！唉，真係一樣米養百樣人，有啲人真係百彈齋主，咩嘢都駁一餐。所以，羊好明白，政策推動係好難令全世界都一樣咁高興！硬係有啲好事之徒，搞搞震。

羊都係打工仔，都想加人工實際啲，不過，政策都已經定咗案，咪開開心心接受囉，始終都係好事嚟嘅。

2018年開始，羊有三十五日年假，點放好呢？