Tag Archives: 吃

老上海飯店，自從搬離灣仔，都有一段日子無去過。陪完大佬睇電腦就行過去。人多左，可能食蟹季節啦。 只有兩個人，食唔到太多，不過大佬都點左: 香乾馬蘭頭併燻魚加燻蛋，菜飯，炒豆苗，小籠包，桂花酒醸酒釀丸子，棗泥窩餅。比較深刻印象係香乾馬蘭頭: 個樣同餐廳一樣，一碟草就平平實實上來了。菜和豆腐乾都切很細碎，淡淡的，保持了馬蘭頭的青草味。其他，都唔錯，不過無特別囉。席間服務的大叔不時過來問味道如何，有沒有其他需要，服務殷勤周到。我地去得比較早，可以慢慢食。都係個句，天南地北，由經濟到佛學都講。中醫又得，西藥又得。同大佬真係咩野都可以討論，雖然有時就大意尐，有偏見左尐，不過男人就係要不拘小節先係㗎嘛。不知不覺又坐到打烊，其實都只係十點五十分…

最近 GROUPON 盛行，同學亦不甘後人，買來Mr. Steak 嘅 SET DINNER FOR 2的優惠券。當然有野食，大家都樂意參加，雖然地點卻是大家不熟悉嘅旺角。為左早尐安定緊張心情（陌生地方嘛），羊咩一放工就閃到油麻地探望朋友，七點十五分就坐定定喺餐廳嚕。 環境唔錯，有個藍色天幕，地方尚算濶落，座位唔逼，但有尐嘈，好在我地坐開面，唔係中心點，好少少。傾計唔使放盡喉嚨，不過都要大聲尐尐，同集中精神聽囉。 前菜係海鮮併盤，鵝肝，同周打湯。主菜就係 AUGUS BEEF牛柳，同龍蝦意大利麵食。大家食完都無意見，都係一般啦。最失望係件AUGUS BEEF，烤㗎嘛，點知無尐肉味。好在無落調味醬，唔係仲浪費。甜品係英國皇室果仁朱古力切餅。切餅內有乾果及果仁，咬下去是軟軟的，和同類fudge cake 比較係無咁甜。加叫梳乎哩，味道一般啦。 整體上，環境服務都好，但食物就唔多得! 呢一餐好似都唔平，應該唔會再嚟食，當然如果同學想嚟，羊咩都唔會抗拒，起碼食得入口。不過，可以去香港島間 MR.STEAK 囉。 又一證明，最緊要大家齊腳食飯開心。所以，其實有陣時，食尐乜，食幾貴都無所謂。 食完休息一陣，就急急腳走人返香港。三個傻嘅，擾擾攘攘又話坐地鐵，又話搭巴士，最後終於上左架112過海。雖然唔快，勝在有時間坐埋傾吓計，笑吓嘛！

羊咩生日週又開始嘞，今次竟然係馬婷第一個同羊咩慶祝！當然，場地由馬經理挑選：中環嘅白玉蘭。餐廳環境典雅舒適，不過人就多啲檯又密啲，好在我地坐近窗口，遠離噪音。 一共叫左四碟餸，清炒河蝦仁（鮮甜），素鴨（甜甜地超好味），小籠包（汁鮮但皮厚）同一碟蒜抄豆苗（一般）。之不過羊咩食左全部嘅三份之二，飽到連甜點都唔想食。無計啦，馬婷腸胃炎，無胃口。所以，羊咩基本上係表演：食晒啲餸。 其實馬婷真係好心地，雖然極忙碌，又轉部門，屋企又全屋裝修，兼腸胃炎，都仲有時間分比羊咩。”一年見兩、三次嘅朋友”，多謝你啦！ 兩小時嘅晚飯，一陣就過。希望保重身體，可以同羊咩，羊細佬打翻波，出年再見！